الجوي المصطفى

كلام من القلب..واش نقاطع وأنا أصلا مقاطع

رئيس التحرير – موطني نيوز

شعب سوقو خاوي وكيتبع غير التطبال والقهاوي..واش كتهدرو من نيتكم ولا غير لاعبين ضحوكي
يا ولاد العبد يا لمشعبطين شحال كتشربو ديال لحليب في النهار وشحال من قرعة ديال الماء المعدني كتستهلكو في الشهر أما المازوط بلا مندوي عليه.
راه المغرب فيه تقريبا 40 مليون نسمة 50% منهم محيط الملك والعاملين فيه وزراء وبرلمانيون ومدراء سامون وعائلاتهم وحبابهم وحباب حبابهم و30% صحاب لفلوس والاغنياء يعني معندهم حتي علاقة بهذا الخريف لي كتعودو و 10% صحاب الطاكسيات والنقل بصفة عامة لي ميقدروش يستغناو علي لمازوط أما لما راهم كيطمعو في لما ديال ردياتور كيشربوه بالبادز.
أما البقية الباقية راهم لمزاليط وسكان العشوائيات ولكريانات وهذو مكيشربو لا حليب لا ما معداني ولا حتى عندهم طوموبيلات.
غير قولو لية علامن داويين انا بعدا مكنشربش لما معدني بصفة نهائية اللهم الا تصاطحت مع شي قريعة كنشربها والخاوي كنعمرو من الروبيني ونديرو في الثلاجة هههه هذا لا كانت الثلاجة أصلا.
والله حتي بقدرت ما ضحكتوني جبتوا لية لبكية بحال الا الملك مول سنطرال و أخنوش مول لمازوط وبنصالح مولات لما معندهم حتي نشاط أخر وهذا المقاطعة غادي دير ليهم فاييت، أش هذا المستوى وصلنا ليه واش هذا التبهديل ديرين في روسنا.
واش في بالكم أن الادارات المغربية بدون إستثناء وزيد حتى لقهاوي والفنادق هما المستهلك الاول للما ولحليب والمازوط، وأنت يا لمقهور يا لمزلوط مصدع لوقت وفاضح الدنيا بهذ المقاطعة، واش في بالكم بلي هذا الحملة راها مغدا تعطي حتى نتيجة والايام بيناتنا حيت الا كنتو كتهدرو بالمعقول متنساوش بلي محلات مرجان في المغرب كامل منعات وبأمر ملكي بيع الخمور لي كيدخل أموال باهضة متحرك فيها والو وأنتوما داويبن على لحليب، واش في خباركم بأن مقاطعة سنطرال غادي يشرد ألاف الفلاحة والتعاونيات لي كيسيروها مزاليط الشعب المغربي هي لي كتدفع لحليب وزيد شحال من أسرة لي لمعيل ديالها خدام في الشركة غادي يشوميو .
المهم باش منكونش ضيف ثقيل عليكم عطا الله فاش نتكلمو وعطا الله الامور لي مموكن ناقشوها وحنا باقين مجمعنا حتى زبلنا من الزناقي وباقي مقهور معندو مايدار كيهز موس وكيكريسي خوتو وزيد وزيد أما الشركات لكبار لي مخدمة ولاد الشعب وكتستافد الدولة منها بتحصيل الضرائب راحنا غير كنخوو لما في الرملة والمصيبة راه كاين لي وصلو هذاك الملصق ديال لمقاطعة لي حتما وراه جهة بعينها راحنا كنوليو بحال الببغاء والسواد الاعظم من ناشري الاعلان محركهم غير الحقد واش لي كاري ولا لساكن في براكة ولي كيركب في الطوبيس والطاكسي كيشرب سيدي علي ولا حليب سنطرال ولا حتي لمازوط وهو معندو حتي بيكالة راه العبث هذا والضحك الدقون بإسم الغيرة..الله يهدينا حتى يدينا .

اترك تعليقاً